關於歐賽決賽，我想說的是 ...

唔經唔覺，上次踼決賽已經係十一年前嘅事（更唔好講伊斯坦堡一役咁遠）

那些年仲番緊學，而且夜晚幾乎唔洗瞓（真係頂唔順嘅話，上堂瞓／走堂亦可），場場歐聯睇晒都仲得

回首肥賓執教嘅年代，歐聯資格固然手到拿來，就算入到淘汰賽嘅成績亦唔差。當年冇人估到球隊會經歷近年嘅低潮，係連喺歐聯亮相都難

人總是失去後才懂得珍惜，所以今年嘅歐聯比賽，仿佛比當年嘅更珍貴

十年過去，人面固然全非，球隊嘅打法亦已大變。不過希望熱血不變，今晚踼番場好波

#YNWA
#StandRed
#in_klopp_we_trust

Allez, Allez, Allez!

從來都唔信邪，唔信咩九星連珠，因為所有紀錄都係用嚟破嘅

只不過純粹記得，2005 嘅歐聯四強次回合，都係 5 月 3 日踼嘅（好似係）

當年嘅形勢險峻得多，首回合作客史丹福橋只能悶和 0─0 ，番主場迎戰該季極為穩定嘅車仔（全季都未贏過佢哋，其中包括聯賽盃決賽，而佢哋喺聯賽只輸過一至兩場），如果俾摩佬先攞到一個作客入球，將會極之難踼

相反，宜家係拎住幾球喺手，不過作客羅馬並唔易踼（歐聯主場未失過波），上一輪嘅巴塞已是前車之鑑，唯有希望 #LFC 今晚醒醒定定，發揮正常

Ps. 講開紀錄，其實我睇高普帶隊踼咁多次決賽（歐聯、德國盃＠多仔、聯賽盃、歐霸＠利記），一次都未見佢贏過。但，又如何？

#邪po
#黑腳
#留名等binc

一步之遙

話說四十幾年前，香港隊與亞洲盃決賽週同樣只有一步之遙。

是咁的，1975年，香港主辧第六屆亞洲盃外圈賽第三組賽事。港隊於小組賽出線後，在政府大球場迎戰北韓，爭奪決賽週資格。北韓在上半場領先兩球，但港隊於下半場連入兩球扳平，法定時間內打成 2:2，比賽進入加時。加時下半場，港隊憑胡國雄的入球首度領先，可惜旋即因隊長鄭潤如的回傳失誤而被追成3:3，需以十二碼決勝。相方互射14輪後，香港最終以10比11飲恨，無緣躋身1976年亞洲盃決賽週

講番2018年，其實聽日又唔洗好似當年咁刺激，只要簡簡單單煲碗魚生粥小勝一球，竟當年未竟之功，大家都肯肯定收貨

BTW 積極考慮聽日午餐食金仔米線，以壯港隊行色

#wearehongkong